正所謂一分耕耘、一分收穫，放諸股票市場亦準。雖然舊年股市唔易炒，但由「金手指」謝清海打骰嘅惠理集團（806），業績依然靚爆鏡，表現費大幅增加1.8倍，經營利潤勁增84%，純利3.8億元，作為主席嘅謝清海，當然豬籠入水。
根據惠理最新年報顯示，謝清海嘅酬金由2012年嘅2,066萬銀，大躍進至舊年嘅3,174萬銀，升幅達到54%；至於第二把交椅、副主席蘇俊祺，酬金更加由原來嘅1,152萬銀，大幅增加84%至2,115萬銀，其中花紅部份更接近倍增，認真誇張。
睇番惠理份全年業績，舊年薪酬及福利開支總額，按年升36%至2.7億銀，反映公司賺大錢，員工齊齊受惠！不過，金融呢行就係咁，所以行內人成日話要好天收埋落雨柴。