長年累月喺議會內外抗爭嘅社民連主席長毛，今日58歲生日嘞。兩名女粉絲噚日率先送上生日祝福，親自去立法會送上寫有「蕉蕉攞命，永不休戰」嘅「香蕉批」畀佢，話「唔想長毛咁好一個人，生日都冇人理」。嘩，男人聽到被讚「蕉蕉攞命」都一定high爆，對用蕉掟高官嘅長毛嚟講更啱口味啦。長毛噚日收到香蕉批後話好開心，事實上呢個係佢今年收到嘅第一個生日蛋糕，「好多謝記得我生日嘅朋友」，佢話會將個批留番今日正日先食，因為要搵埋佢個九歲契女一齊慶祝分享。問到佢58歲生日願望係乜？長毛話「冇，真係冇」，因為生日其實係「母難節」喎。