曾於1967至1978年效力紐約尼克隊，分別於1970及1973年獲得NBA冠軍指環的Phil Jackson，在三月十八日重返紐約，擔任尼克隊（New York Knicks）的總裁，負責球會的籃球事務，尼克球迷大表歡迎。
積臣在球員時期，主要是做「大後備」，「第六人」之類，防守勝於進攻。1980年退休後，只能當上一支CBA球隊的教練，毫不起眼，但在他的帶領下， Albany Patroons竟在1984年贏得CBA冠軍，之後一直想重返NBA做教練，但經常碰壁，卒之等到1987年芝加哥公牛隊請佢做助教，1989年爆冷升正，之後就係歷史了，因為佢從此一帆風順，帶住米高佐敦與柏賓等明星球員，奪得六次NBA冠軍，點知公牛隊總經理Jerry Krause妒忌佢，逼佢走人，隔咗一年，積臣加盟洛杉磯湖人隊，帶住兩位大明星奧尼爾、高比拜恩，又先後攞咗五次NBA冠軍，連埋佢球員時代，一共有十三隻冠軍指環，係一個空前紀錄，相信要等三四十年先至或者有人打破。
因乜事積臣返回尼克隊而唔聽高比拜恩嘅公開呼籲，返回湖人隊力挽狂瀾呢？又係同人有關。湖人隊班主Jerry Buss死後，由兒女繼承，68歲嘅積臣與老闆女拍拖，老闆仔睇唔順眼，上一屆湖人隊成績唔好，老闆仔故意不理會高比嘅要求，係要請迪安東尼做教練，唔俾積臣重掌軍符，今屆湖人戰績仲曳，老闆仔更加唔肯請積臣回巢啦！古今中外，有太多大老闆揸弗人係為了面子而管理一個機構，死不肯認錯嘅，相反，尼克隊連年戰敗，支出浩大，成績平凡，而紐約係一個大市場，班主總唔能夠長期甘於平庸嘅。積臣出身於一個嚴格管教嘅教會家庭，要等到讀高中，先至第一次睇電影，入到大學，先至第一次跳舞，自幼「被」嚴守紀律，大個仔後，就反叛，脫離基督教，研究東方宗教，鍾愛禪學，故此外號「禪師」，係美國籃球界一個異人。佢在芝加哥時，班主話俾佢聽，做老細要請一位夠膽同佢鬧交、辯論嘅總經理，咁樣先至會聽到不同嘅意見，管理層不致於盲目犯錯。有人問積臣，點解米高佐敦做咗班主之後，硬係唔掂呢？積臣就話：佐敦鍾意請擦鞋仔包圍住佢做管理人喎。