《明報》內外交煎，又多一則壞消息。深得專欄作者信賴嘅《明報》觀點版編輯伍瑞瑜不滿被調去寫社評，正式辭職，令到一班作者好愕然。據講佢嘅筆名係俞萃風，早排寫嘅即時評論鬧過思歪、蔣麗芸、林奮強等，其中一篇《讓愛與和平佔領郵輪》更被網民傳頌一時。據知佢過去十幾年一直係《明報》觀點版編輯，本來同劉進圖拍住上兼寫即時評論，但劉俾人斬傷後，公司安排佢頂替劉寫社評，佢反抗無效，惟有辭職。𠵱家《明報》即時評論幾乎真空咁滯。伍瑞瑜同八方講唔想做訪問。
明報員工關注組話，對觀點版今後發展表示關注，希望各作者繼續針砭時弊，不平則鳴。