早排提過上市公司獨立非執董嘅袍金一般都係10萬至30萬元，港交所（388）獨董普遍有70萬、80萬元算係幾高，原來恒生銀行（011）舊年都大幅調高獨董嘅年薪，最新有49萬至87萬元，加幅介乎17%至79%，最高薪嘅獨董係李家祥與身兼機管局主席嘅張建東。
恒生有八位獨董，根據恒生最新年報，張建東舊年董事袍金87萬元，增加74%；另一位獨董李家祥一樣係87萬元袍金，增加45%。兩位袍金特別高可能跟佢哋嘅會計背景有關，二人同時擔任恒生董事會旗下審核委員會同埋風險委員會成員。
恒生獨董兼主席錢果豐舊年袍金就有74萬元，升29%。至於一姐李慧敏，舊年年薪1,943萬元，增加70%，不過佢2012年5月先至正式出任行政總裁，所以唔可以完全蘋果與蘋果咁比較。