梁錦松忽然高調表態說，不接受篩選過的有商有量，香江就會覆舟。有人聽到嚇一大跳，問這句是不是f字粗口的變奏。
覆舟、一錘定音，明明是廣東話，聽極唔明，不如實話實說，講吓到底唔通過篩選方案，會點？
一，原地踏步。唔使死喎，但各位推銷員硬係解釋唔到，原地踏步，點解比衝紅燈壞。所以，老實點，講清楚，原地踏步的話，阿爺會老羞成怒，從十七樓擲晒你全屋傢俬落街，擲無可擲，就會擲埋你老母！驚未？
二，民主倒退。真係的，你睇海怡區補選，堂堂民主黨大佬竟然輸幾條街！假如無篩選，民主派的候選人，隨時初賽已出局，輸俾落選×姐，民主招牌，係咁先。
三，斷水斷電。東江水叫停，電網都要靠祖國特供的特區，唔聽阿爺話，實聽咳電。低頭族和宅男，在水電和何俊仁之間二揀一，實無甩拖！明日的香港，不是今日的台灣，再嘈嘈閉，核電廠係咁二出點事故，香港霎時斷氣，救番都變植物人。港燦醒水，覆舟，就是末日的福音，你懂的。