鑽石要經過時間打磨才能發出耀眼光芒，人也要經歷磨練才能成大器，Janice Man(文詠珊）因電影《那夜凌晨，我坐上了旺角開往大埔的紅VAN》人氣再度急升，去了柏林影展又飛到巴黎睇騷，星味漸濃，予人脫胎換骨的感覺。入行十年嘗盡甜酸苦辣，然而工作順利，卻失去了拍拖十年的男友，惟有以工作填補寂寞感覺，靜待真愛來臨之時，不排除隨時閃婚。
撰文及造型：顏英儀
攝影：郭賢興
今次Janice Man的訪問特別飛到巴黎拍攝，3月初的巴黎還下着微微雨，令整個城市變得更浪漫淒迷，幸好天公造美，拍攝時突然放晴，令整個拍攝過程順利進行，而JM在10度的氣溫下穿上薄如蟬翼的春裝，旁人見她冷得將變雪條，但鏡頭前擺出多個甫士，JM跟自己說「好熱，好熱」，專業程度攞滿分。
陳果執導的《紅Van》，已鐵定下月10日上映，上月JM與同劇演員飛到柏林電影節，行紅地毯時備受外國傳媒注目，回港後星味更濃，JM說：「柏林反應好好，《紅Van》係香港原創小說，好開心同惠英紅、任達華等前輩合作，架Van仔一共有17個人，每個角色都好出，我演嘅Yuki性格神秘又奇怪，成套電影好多群戲，拍得好開心。」
撐港產片
今日JM已由模特兒蛻變成演員，希望挑戰不同角色，「我唔會限死自己，可以演醜女、妓女高難度角色，越醜越有挑戰性，不過就唔會裸露。」
近年港星北上拍戲，與JM同期出道的Baby已長駐內地拍戲掘金，JM卻力撐香港電影，「也有收過國內劇本，但作為香港演員，都希望作品可以得到認同，今年我有２、３部電影上，好期待成果，想有進步空間。」夢想一天拿金像獎嗎？「提名唔會諗太多，但都會訂立目標，反而得到觀眾認同，滿足感會更大。」
閃婚Why Not ?
工作順利，然而感情卻發生變化，上年JM與拍拖近十年的男友李冠峰分手，早前忽然被傳搭上謝霆鋒，「都唔明點解會傳緋聞?好想拍拖，遇到啱嘅人Why not ?只要啱timing，大家click到，搵到適合嘅人都唔排除會閃婚，有時候出現嘅人唔啱timing，過幾年可能啱都未定，原來就係the one，以前諗過30歲前結婚生仔，𠵱家唔諗呢啲，緣份要到就到。𠵱家冇拖拍就專心工作，好享受單身，但都會感到寂寞，所以會將工作排到好密，等自己忙個不停，因我停底會亂諗嘢。」
大把青春
JM思想成熟，皆因是家中的長女，「由細到大媽咪都叫我老人精，因為我是家姐，爹哋媽咪鬧交我做和事老，比較照顧家人。」JM 15歲入行，工作十年，還有大把青春，這十年得的比失的多，「由細個啱啱出嚟影相，咩都冇，一個人秤住高踭鞋、衫，由荃灣坐地鐵去柴灣，去casting、影相，每日都好忙，仲要做功課，呢個係一個過程、經歷，令到我變得成熟、獨立，到𠵱家有一個團隊，呢啲都係咁多年慢慢儲返來嘅；失去嘅可能係自由，對我來講影響不大，因為我係一個我行我素嘅……十年喇，慶幸我仲係25歲。」
髮型：Matt Chiu@Xenter
化妝：Vinci of VCW makeup
更多精采時尚內容，盡在 http://add.appledaily.com。