單睇恒指噚日跌114點，會以為大市風平浪靜，其實新經濟股先係大屠殺戰場，科網、環保、新能源板塊，半成跌幅乃最低消費，大有要錢唔要貨味道，戰友入場博反彈，最好分注介入，始終累積升幅已多，獲利盤可以沽得好凶狠。
柏能集團（1263）日前公佈盈喜，受惠產品組合改善，全年盈利將顯著增長，集團主要產品包括圖像顯示卡、主機板及迷你電腦，亦同時提供電子專業製造服務（EMS），客戶包括互聯網媒體平板電腦、銷售點（POS）及自動櫃員機（ATM）系統，以及發光二極體（LED）模組塊供應商，完全食正科網熱潮。歷史市盈率僅11倍，在盈利大升下，肯定得番單位數，兼有4厘息打底，睇圖已屆造旗尾聲，隨時喺下星期一放榜前再炒一轉，戰友可留意。
舊經濟股可𥄫實華潤水泥（1313），集團去年盈利按年增長44%，毛利率由24.1%上升至28.5%，全年派息增加50%至10.5仙，最重要係負債情況繼續改善，淨借貸率由87.2%進一步減至71%。預期水泥價格今年持續反彈，加上受惠新型城鎮化以及淘汰落後產能，作為龍頭之一嘅潤泥，前景值得睇高一線。戰友可候回試5.5元吸納，中線博兩成升幅難度不大。
唐牛