香港中華總商會同香港友好協進會噚日搞咗個論壇解讀「兩會」，全國人大代表譚惠珠主講「法網新猷」，再度語出驚人。話說珠姐講到司法機關工作時，竟然以薄熙來案作為例子，話內地法庭審訊越來越公開，因為設有「中國法院庭審直播網」，大讚各級法院直播案件庭審多達4.5萬次，即係可以將法律面前人人平等嘅訊息，傳入民眾嘅客廳、飯廳喎。
八方聽到呢度，認真想問句：如果中國司法真係好似珠姐所言咁公正透明，點解國內維權人士被失蹤、被自殺、冇犯法但又被長期軟禁嘅事，仍然無日無之咁發生？查實愛國係得，但唔使咁盲目啩，珠姐似乎係反面教材。