【張耀榮逝世之活在歌聲裏】「演唱會之父」張耀榮昨凌晨因心臟病猝逝，享年82歲，震驚樂壇！耀榮叔生前為歌手圓紅館夢，四大天王張學友、劉德華、黎明和郭富城對他的離世深感惋惜，城城希望星光大道可立銅像表揚，一生貢獻樂壇的耀榮叔不只為巨星搞騷，當年鍾鎮濤（阿B）破產獲他力挺，去年肥媽割除子宮瘤，原來耀榮叔計劃明年再幫他們開騷，可惜他卻走了！
曾為四大天王、張國榮、梅艷芳、譚詠麟、許冠傑、徐小鳳、鄭秀文、楊千嬅、容祖兒和陳慧琳等巨星搞紅館騷的耀榮娛樂揸弗人張耀榮，昨凌晨因心臟病發送院搶救不治！耀榮叔生前一手造就四大天王圓紅館夢，昨日學友到深水埗出席惜食堂活動，坦言感到非常突然，已致電經理人陳淑芬問有甚麼幫手，學友說：「自己第一個演唱會係耀榮叔做搞手，佢對香港演唱會貢獻好大，佢走咗真係會少咗一股力量，佢係一個好爽嘅人，講嘢一句就一句，佢係一個象徵，見證香港演唱會興衰。」
紅館後台笑聲不再
身在北京拍戲的城城接到消息好愕然，希望政府可豎立銅像表揚耀榮叔，他說：「好唔捨得！自己第一個演唱會係張生搞，從未間斷，張生好可愛，記得我送過一條紅色心形呔畀張生，每次佢都戴住嚟撐場，又成日喺後台同我哋講笑，最鍾意完騷同大家消夜。不過，以後紅館後台再聽唔到佢嘅笑聲，但佢永遠喺我心入面，我永遠對佢有一份敬意，希望政府可以喺星光大道立個銅像紀念張生，表揚佢嘅貢獻。而我將來做騷都一定會記起佢。」
黎明當年開騷跟耀榮叔攬頭攬頸，昨日他說：「相信每一位喺紅館同耀榮叔合作過嘅歌手，都會好懷念佢。」劉德華亦對耀榮叔的離世感惋惜：「絕對係樂壇一個損失，耀榮叔就好似一位老師，教曉我點處理同尊重演唱會，佢令香港演唱會發放光芒，永不言休精神令人敬佩。」另譚詠麟在微博留言：「一路走好！」李克勤則說：「永遠記住佢嘅笑聲。」
天后級歌手亦紛紛悼念耀榮叔，鄭秀文說：「我認識嘅耀榮叔好樂觀、好熱鬧、好動，好似大細路嘅前輩。」而楊千嬅難過地說：「上次祖兒後台我好興奮整夾餅，同佢share食，我好敬重同尊敬耀榮叔，佢畀我機會完成紅館夢，真係作育英才，最記得佢講：『冇人做我做』呢句，佢真係做得到。」林憶蓮說：「好印象深刻佢風趣健談，聽到呢個消息好突然，失去演唱會之父好惋惜。」
耀榮叔走了，耀榮娛樂今年尚有許冠傑、林宥嘉、伍樂城作品展未開騷，另明年耀榮叔原來計劃幫阿B、肥媽瑪利亞開騷，02年破產的阿B獲耀榮叔力挺搞兩場演唱會，昨日阿B獲悉長輩離世感痛心：「近年每次見到佢，佢都鼓勵我再開演唱會，但我一直拒絕，因為覺得自己未ready，上次見到張生又叫我開，結果簽咗畀佢幫我入紙申請下年紅館檔期，𠵱家都未批未知做唔做到，張生就唔喺度。」阿B大讚耀榮搞演唱會一心支持歌手，坦言對他相當尊敬。
阿B肥媽計劃開騷
至於去年割子宮瘤的肥媽，亦獲耀榮叔力邀明年開騷，肥媽說：「冇幾耐之前喺馬會見到佢面有啲腫，佢話冇事。佢永遠唔托手踭，搞騷冇諗賺蝕，上次我病，佢叫我唔好理票房，真係好人到不得了，本來話明年再幫我開演唱會，喺紅館入咗紙，𠵱家開唔開到唔理，最緊要佢家人搞好後事。」至於謝霆鋒本計劃再開騷，因忙拍戲擱置，錯過跟耀榮叔再合作機會，他說：「自己好耐冇開個唱，主力擺喺電影，去年諗過開演唱會，但因為籌備時間不夠，冇得再同演唱會之父合作，覺得好惋惜。」
採訪：皓騫
