和黃（013）減持屈臣氏套現後，與長實（001）齊派7元特別息，有份收息嘅退休教授曾淵滄早前喺專欄自爆，佢持有長實嘅成本只係每股5元，已經羨慕死人。佢噚日出席一間證券行嘅開幕禮後繼續晒命，話自己好多隻藍籌都係幾蚊入市！
佢隨便舉例話，揸住十幾萬股匯控（005），每股成本唔使5元（昨收77.8元）；中移動（941）成本都係10元左右（昨收67.6元），四大內銀股全部都係抽新股抽番嚟，銀娛（027）就喺嘉華建材年代已經持有，成本以毫子計，認真巴閉！
佢堅持話呢批股份嘅用處係收息，無論點都唔會沽貨，事關低位買好股可遇不可求，而且𠵱家呢種機會越來越少，最近一次已經係跟邢李㷧喺10蚊樓下翻兜思捷（330），睇嚟散戶都係得個恨字。曾教授咁識投資，噚日喺證券行難免被師奶散戶團團圍住問市。