【灣仔星街】林海峰（Jan）與彭羚結婚多年，男主力開咪搵錢，女就專心湊一對寶貝女、15歲的林泳及9歲的林清，平時大多數只見彭羚湊女，甚少拍到一家四口齊齊出動。阿Jan上星期六難得不用返商台工作，晚上便帶着她們齊齊去灣仔星街食意大利甜品2/3 Dolci，四人齊齊排排坐，大女林泳樣子清秀似足媽咪，而細女林清就動作多多，夾在阿Jan與彭羚中間坐，都坐唔定周身郁。
細女餵甜品
阿Jan率先食完雪糕，彭羚則在另一旁幫手照顧細女，林清十分鬼馬，要將自己未能完成的甜筒餵給爹哋食，起初阿Jan都食了一啖，之後好有手尾起身將餐牌放回原位時，細女又再度要求阿Jan幫手食，他即笑笑口拒絕。
阿Jan與彭羚一向警覺性甚高，可能一家四口溫馨撐枱腳，都未有發現傳媒偷影，直至余文樂湊巧揸車來到通水，阿Jan即收起慈父笑容，與彭羚先行出店外取車，等車到達門口，即叫兩個囡囡跳上車，家姐林泳十分淡定，亭亭玉立，而林清則跳住上車，入到車廂亦好奇探頭偷望記者，認真好奇可愛。
採訪、攝影：徐錦池、羅德光、吳耀輝
