收視冇得再低嘅亞洲電視，對以689低票當選嘅特首狼振英「功績」好感興趣，原來都係低EQ嘅新聞統籌專員馮煒光嘅「成功爭取」。
話說噚日朝早嘅行會，亞視記者竟然罕有搶問問題，與此同時左報竟然罕有派記者等行會，唔少人看在眼內覺得事有蹊蹺。
八方追查下發現，原來馮煒光前日致電唔少左派傳媒高層，提點可以派員去行會問「做媒」問題：「CY你今日當選兩周年，有乜嘢範疇希望做得更加好？」哦，原來噚日係狼英當選兩周年，相信全港應該冇乜嘢人留意或關注，難怪要IC提水。
最終指定問題由亞視男記者成功搶問，佢之前問咗少少饒戈平講公民提名，試圖「溝淡」突兀感；狼英一聽到「做媒」問題，即講足3分鐘，自讚施政進度理想，情況令人滿意。原來新聞統籌專員就係咁樣「統籌」傳媒㗎嘞。有知情人士仲報料，亞記高層上周同馮煒光食飯後，採主即刻柯打記者搵學者comment狼英兩周年政績，可見白宮發言人幾咁悉心部署。