英超賽會儍的嗎？球證馬連拿上周六喺車路士對阿仙奴嘅比賽，認錯基蘭基比斯做阿歷士張伯倫，結果手球嘅張伯倫冇事，無辜嘅基比斯就攞紅牌；我求大俠覺得，要捉馬連拿去驗吓眼先得！但原來英超賽會都一樣係盲嘅，當呢件事冇到，唔單止冇處罰馬連拿，仲搵佢喺嚟緊周末吹修咸頓對紐卡素。
紐記黑兵仲難認
我求大俠真係好擔心，紐卡素陣中嘅柏比斯施斯、艾美奧比、穆沙施素高同迪奧迪個樣都幾難分，唔知馬連拿又會唔會再認錯人呢？英國《太陽報》就幫馬連拿搵吓擺烏龍嘅原因，佢喺上周四喺費倫天拿對祖雲達斯場歐霸盃做助理裁判，上周五先坐飛機返去英國，仲要喺法蘭克福轉機。《太陽報》估計馬連拿可能舟車勞頓，唔夠休息，所以認錯人喎。
不過，我求大俠最不滿嘅都係英足總同英超賽會，明知馬連拿連球員都認錯，罰都冇罰；最誇張嘅係，阿仙奴為基比斯同張伯倫上訴，英足總竟然判佢兩個都唔使停賽。
基比斯張伯倫免停賽
基比斯無辜受罪，唔使罰係應該，但張伯倫喺龍門口撲波，有意識攔阻對手射門，咁都唔使追罰停賽，有冇搞錯！英足總接受阿仙奴嘅抗辯理由，認同夏薩特嘅射門應該唔中目標，所以張伯倫用手擋波都唔係阻止入球，所以唔使坐波監。
另外，上周六阿仙奴慘敗0:6後，奧斯爾就喺夜晚開party，同女友文迪慶祝24歲生日；文迪之後擺相上網，見到賓特拿同奧斯爾笑晒口，而沙格拿都有出席。我求大俠覺得，文迪生日會日期應該一早定咗，冇理由因為輸波而取消，但奧斯爾同文迪應該有番少少政治智慧，唔好亂咁擺相上網刺激啲球迷。
