Samantha名符其實是「港英餘孽」，回歸第16個年頭，仍死命抱住那本BNO不放。肥彭來港，部份人感觸至聲淚俱下，哭求對方治港咁，未免太煽情，好似情侶分手，總有人念念不忘，但亦有人痛哭三日重新上路。Samantha認為民主是要爭取，但扭轉現況仍靠自身努力，好似早年返內地搵食的廠商，20年前在強國待遇，同現時都天淵之別，若果唔識腦筋急轉彎，就等同見到金都唔識執，港資廠商葉氏化工（408）就為轉彎踏出第一步。
逾九成業務來自內地的葉氏化工已出全年業績，營業額雖創出近百億的新高，但受累溶劑毛利率下跌，以及塗料業務與廠房整合所衍生出一次性的額外費用開支，純利按年跌9%，拖累股價六連跌之餘，亦創逾一年新低。眼見熔劑佔逾六成的生意額，執董Johnson坦言，不打算食老本，反而將會重點發展塗料業務。
強國同胞開始注重健康，故此淨味、甲醛淨化等技術料可有市場。另一方面，葉氏亦向高難度挑戰，轉戰數碼產品的塗料，去年投得華為等大陸品牌的定單。Johnson解釋，呢瓣業務生產量雖然不多，但對產品要求極高，做版都做咗好多次，所以呢啲品牌肯畀較高價錢換取質素，毛利率高達50%！雖然呢瓣業務佔整體只是小數目，但起碼證明佢哋為發圍仍鬥志旺盛。
Samantha
本欄逢周一、三、五刊出