阿里巴巴創辦人馬雲早排斥資62億元買起文化中國（1060），搞到一班衰貪心嘅散戶成為蟹民。文化中國噚晚有新消息，不過唔係阿里注資，而係要投資電影，搵來台灣知名電視製作人柴智屏（柴姐），同埋《那些年，我們一起追的女孩》導演九把刀（原名柯景騰）合作，實行以香港呢個上市平台，融和中台關係咁話喎。
根據協議，文化中國有權喺五年內，投資柴智屏旗下群星娛樂製作嘅五部電影，呢批電影由柴智屏監製，並由九把刀擔任導演或者編劇；或者係柴智屏任監製或編劇。
記得馬雲講過當年受員工影響，買咗周星馳嘅《大話西遊》返屋企睇，就開始留意電影市場，後來佢投資內地A股華誼兄弟，𠵱家買起曾經投資星爺套《西遊．降魔篇》嘅文化中國，轉頭就走去台灣搵人合作投資電影。到時唔止財經版，馬雲好快佔據埋娛樂版。