劉青雲、古天樂、周迅同導演麥兆輝，噚日喺灣仔影視博覽舉行《竊聽風雲3》記者會，今次終極篇題材同房地產有關。
周迅接受訪問時笑言上次拍麥兆輝套電影《聽風者》時死得早，所以導演今次補償佢演出，飾演一位被土豪照顧同欺負嘅媽媽。
青雲自嘲多皺紋
去完西班牙旅行肥咗幾磅嘅青雲，喺揭開自己造形海報時話：「好多皺紋，好似變成石像，啲人名流千古就係咁。」至於冇出席嘅吳彥祖因為海報有一間間橫紋，被各人取笑係「鬼祟斑馬」。訪問時被問到今次戲中唔少角色有影射現今香港嘅黑金政治，題材好敏感，青雲否認話：「冇呀，我覺得咁講，若然攞個subject大家都冇興趣嘅，咁梗係攞個主題大家覺得幾得意，多聯想力，比較吸引。我覺得選擇呢個題材好啱，唔覺影射，大部份地方都係咁，好似東京、倫敦都有人炒樓。」佢相信今集票房會唔錯，因為頭兩集已經打好底加上題材夠特別。
另外，青雲同古仔同樣憑電影《掃毒》獲提名今屆香港電影金像獎影帝，兩個人喺現場互笠高帽，青雲讚古仔喺《掃》片裏面演出跳脫，古仔話：「我都係貼佢，有份投票，我投嗰啲係第一輪，青雲係靈魂人物，我呢個跳脫性格，都係多得佢指導。」
撰文：馮仁昭