【本報訊】本土廣東歌70年代抬頭，當年大專會堂已「廟小難容大神」，張耀榮把83年開幕的紅館化身成可容納逾萬觀眾的演唱會舞台，讓「歌神」許冠傑把廣東歌帶進殿堂；再助徐小鳳、張國榮、梅艷芳等當紅歌星唱入紅館，造就本地樂壇輝煌歷史。
徐小鳳連開43場
港大香港研究課程總監朱耀偉說，香港於70年代經濟起飛，許冠傑等本地歌星唱的廣東歌抬頭，風靡樂迷，但當年大專會堂只能容納千多人，83年4月開幕的紅館可容納逾萬名觀眾，張耀榮覷準商機，申請為演唱會場地，讓許冠傑同年5月舉行演唱會。
香港樂壇80年代步進輝煌期，甄妮、關正傑、張國榮、梅艷芳、張學友等歌星，與張耀榮合作到紅館開演唱會成為「當紅」指標，且場數越開越多，張國榮1989年連開33場，徐小鳳1992年連開43場，被列入健力士世界紀錄大全。許冠傑04年共開44場，但分階段舉行。譚詠麟是在紅館開個唱總場數最多的歌手，朱耀偉說不少歌手因此賺到「第一桶金」，而當年娛樂不多，觀眾會「盛裝」到場。
音樂人周博賢說，張從日本引入演唱會製作模式，講究舞台效果，觀眾目不暇給，但也被詬病太着重形式，「最緊要多爆破、升降台」，卻忽略音樂本身。本地樂壇唱片銷量慘淡，朱耀偉指演唱會成為歌星重要收入來源，但本地歌手獨霸紅館盛況不再，如台灣五月天演唱會反而更叫座。
歌星追悼
衷心感激
陳慧琳：
「好傷心，希望佢安息，佢家人節哀順變。當年自己入行兩年，耀榮叔好賞識我，大膽投資畀我第一次喺紅館開演唱會，之後所有演唱會佢都有投資，冇耀榮叔我就冇咁快踏上紅館舞台，衷心感激佢！」
貢獻好大
許冠傑：
「我第一個紅館演唱會係耀榮叔主辦，佢對香港演唱會行業有好大貢獻，聽到佢突然離世消息，我感到非常傷感，希望佢家人節哀順變，我喺上海遙遠祝福佢同佢家人。」
親切和藹
容祖兒：
「好惋惜，我同張生合作過好多次，最難忘每次都叫佢一齊跳高影相，佢年紀咁大都肯一齊玩，係一個好親切和藹嘅長者。每年農曆年佢都派大利是，佢真係演唱會教父，好難忘，好傷感！」
十分尊重
陳奕迅：
「耀榮叔係我好尊重嘅前輩，我開第一個演唱會係佢做，希望佢家人節哀順變。」
