新城電台今年搞「香港味之年賞」，從市面食肆挑選一啲有特色嘅食肆，編造一份名單，再由食評專家評審，但市面食肆咁多，點樣挑選呀？新城以前派職員四出試食，今年有新意思，公開招請「神秘食客」，四出覓食寫報告，食費當然由新城支付，至於詳情如何，左丁山不甚了了，最好直接問新城，不過左丁山開玩笑咁向當事人講：「做神秘食客幾好玩，我想參加，有冇資格？」當事人話：「講食你就有，弊在好多人認得你個嘜頭，神乜鬼秘吖！」於是請纓無路。
呢日基金主席博士G搵埋博士L（健康食物專家），天真許、石老師、紅酒專家靚女M等吃飯，近近地，佢就卜咗銀行家會所（Bankers Club），在置地廣場告羅士打大廈頂樓，高級銀行家出入之地，比南華大廈五樓嘅華商銀行公會會所（中層銀行經理、主任出入），在級數方面，自然係高啲嘅。左丁山好多年前係會員，但離開銀行界後，只有賓架P等等人物請食晏，先至會到呢度吃西餐，覺得水準不俗，頗為適合銀行高層嘅身份。
不過呢日博士G在中菜廳請客，一吃便知沒有水準，令人皺晒眉頭，翠華茶餐廳一定好食得多，呢度嘅中菜（憑該日所吃之點心、叉燒、浸菜等等所見），仲差過南華大廈五樓。假假地係高級賓架用膳地方喎，如此水平，如左丁山仍然係會員，點夠膽在此請客呀？好彩食飯食得多，食到餐sub-standard嘅，無所謂，既有意好友在座，大家談笑風生聽吓博士L講健康，石老師講股票，天真許講黃金，靚女M講紅酒，已有足夠「食材」餵飽自己，唔駛介懷食物水平。飯後在街上碰到食家V，佢話晚上會到蓮香樓吃八寶鴨，名菜也，聽咗就口水流。點知第二日睇報紙，蓮香樓竟然被控以燒鴨冒充燒鵝出售，真係世風日下矣。蓮香樓既以鴨出名，何必以鴨冒充鵝呢？還是大集團有規有矩，餐飲M到美心（MX）吃下午茶，順口叫碗燒鵝瀨，夥計對佢講：「我地只有燒鴨，冇燒鵝」，可見得MX對員工有訓練教導也。