狼振英上場兩周年，四大地產商中，新世界同恒基一早向狼振英俯首稱臣；近日狼英借勢搞壇「築福香港」，畀地產商再顯忠誠，科水同政府一齊救助弱勢社群挽救低殘民望，新世界同恒基繼續瞓身出錢又出力，長實卻堅持唔埋狼英堆，誠哥冇捐錢助狼英挽民望。新地郭氏三兄弟亦榜上無名，唔知係唔埋堆、抑或有官司在身，狼英唔侵佢玩？
贊助機構新世界最落力
由政府扶貧委員會牽頭嘅「明日之星」計劃噚日出爐，計劃係拉攏商界同社福界、學校，一齊透過獎學金、參觀企業、實習機會等項目扶助基層年輕人，屬「築福香港」其中一個旗艦活動。參加機構有逾200家，投入資源達800萬，料有約7,000名年輕人受惠，而計劃為期3年，啱啱好玩到2017年下屆特首上場game over。
八方打開張參與同贊助機構名單，發現清一色梁粉。最落力非新世界莫屬，透過旗下多家公司做狼英啦啦隊，周大福、會展、愉景新城、K11、新巴城巴、新渡輪、協興、惠保、新創建都有份。恒基都有參加，但論賣力度明顯輸咗畀新世界。咁又係，新世界鄭家純喺狼英當選後變節為地產商第一大梁粉，呢啲氣勢，點輸得呀？
但純官噚日冇出席揭幕禮，新世界由鄭裕彤次子鄭家成做代表、恒基李家傑亦畀面出席，捐錢之餘瞓埋身！八方發現其他地產商如信和、置地同華人置業都有參加，但未有具份量人士現身撐場。民望咁低，相信狼英要地產商出錢出力搞大龍鳳嘅活動陸續有嚟，唔知李嘉誠係咪可以企硬唔埋堆到底？
mailto:[email protected]