梁詠琪（GiGi）、古天樂、楊千嬅及導演彭浩翔等，前晚在尖沙嘴文化中心出席新片《香港仔》首映禮，周秀娜、李心潔、葛民輝、鄧麗欣、黃耀明及余文樂等捧場。一班主要演員睇完《香港仔》首映後，即移師到附近餐廳開party，踏正凌晨，趁眾演員影大合照時，工作人員突然推出蛋糕，為昨天38歲生日的GiGi慶祝，眾人齊為GiGi唱生日歌，其西班牙籍老公Sergio就在此時現身，GiGi感動得差點落淚。
娜姐遲到申冤
眾人起哄叫Sergio咀太太，Sergio亦樂於接受大家的請求，連咀了3次。當記者要求他再親一次時，GiGi指住古仔笑說：「我老公喺呢度喎。」古仔即作勢扮抱抱她。GiGi說：「唔知點慶祝，要做訪問，老公要求我留啲時間畀佢，話有surprise，我仲未收到禮物。」
千嬅穿上藍色裙示人，有點衣不稱身，她解釋：「件衫比較鬆，因為我個身薄又冇胸，除非再生第二胎餵人奶，就有意想不到效果。」周秀娜前晚睇首映遲大到，她辯稱：「其實我係最早一個到，去到發覺仲未有人，咪去食個飯先，點知食完飯返到去見到全世界都到齊，結果最早變最遲。」
此外，余文樂被傳與模特兒Ase拍拖，他說：「自己呢個歲數，拍拖會坦白講，若果影張新相就話係女友，我就嚟連朋友都冇晒。同Ase識咗好耐，之前喺洛杉磯同佢約食lunch，𠵱家仲未搵到女朋友，我都半放棄狀態，細妹仲快過我，佢拍緊拖。」
採訪：藍文浩
攝影：陳俊強