廠商會有連串活動慶祝80歲生日。除咗9月請市民免費食雪糕，佢哋亦搵嚟跨媒體創作人彭秀慧幫手拍短片，邀請唔少演藝人幫手講故事，訴說廠商會歷史，稍後喺RoadShow日播夜播。
雖則一班廠商會核心領導，唔使粉墨登場，但佢哋另有任務在身，就係逐一亮相亞視嘅廣告特輯，親身同觀眾hardsell。亞視至like翻叮節目，相信呢個廣告特輯會一日播幾轉，廠商會賺咗啦。
會內巨頭為80大壽咁落力，試問屬新生代嘅青委又點可以袖手旁觀？八方聽聞佢哋已經準備下海，近期搵埋排舞老師積極練兵，鐵定4月17日喺廠商會於會展筵開150席慶生之時登台表演，有成員預告，呢場歌舞騷會令大家有意外驚喜，仲叫八方擔定凳仔咁話喎。