三江化工（2198）剛啱公佈咗靚仔業績，作為全國最大私營環氧乙烷生產商，家陣PE仲係得4倍，兼有高達6厘息，吸引到痹。煲三江，博佢翻一番。
收入純利創新高
三江2013年度（12月結）收入及純利，雙雙創上市以嚟新高，到39.4億銀及6.05億銀人仔，純利增長近30%，PE得4.7倍。行家天德化工（609）新鮮熱辣業績公佈後，家陣PE近8倍，葉氏化工（408）仲企喺11倍雙位數，三江平咗一大截。
三江主打產品，主要用作下家製藥、殺真菌劑、防凍劑、合成樹脂等等，係民生必需品。又進口環氧乙烷只佔祖國市場1%，海外競爭幾乎係零。而上年，三江新置或併購廠房，投產後，係以「滿負荷」去形容產能狀況，睇到有幾肥仔。呢期阿爺兩會，再重點提出城鎮化，透過呢壇製作，激活實體經濟，對三江產品未來需求，仲爆。
三江兼向上游發展甲醇制烯，又收購埋浙江美福碼頭51%，為甲醇制烯生產，提供物流運輸。成壇製作，係三江重要戰略發展。
諗到係，三江一條龍式嘅生產規模，更完善，keep住龍頭優勢之餘，協同效益每年兼可為三江提供額外1.4億銀人仔收益。單係呢筆數，相當於集團上年純利23%！
係咁意估三江今、明年度，EPS增長20%咁大把，到0.92港銀及1.1港銀，今年預測PE跌到得3倍。又三江最新息率高達6.3厘，當集團keep住31%派息率，今年每股派息上到0.29元，息率回報7.5厘，又係吸引到爆。
買三江，博破4.5元頂，翻一番到7.5元咁計，明年度PE，7倍咁大把！
錢雋
細價股專家
本欄逢周二、五刊出