八方嘅攝記同事噚日喺台灣行政院衝鋒陷陣直擊清場，喺混亂嘅環境努力工作，點知警民衝突之際被撞到跌低。企番起身繼續影相啦，諗住換手拎攝錄機（圖）拍片時，發現部機唔見咗！大件事喇，佢即刻好緊張四圍搵，但搵勻都唔見，此時警方步步進逼，心裏幾焦急呢你話。搵搵吓，佢見到有個警察拎住部機，仲要拍緊片！攝記大哥肯定部機係佢嗰部，就過去問警察要番啦，點知對方話部機係同袍交畀佢搜證喎。攝記心諗「唔係嘛，用我部機搜證？」再用堅定眼神同語氣表示「部機是我的」，警察又真係畀番部機佢。原來警察對於同事中途畀部機佢搜證都感奇怪，所以就信攝記大哥。部機失而復得，真係鬆一口氣呀！