現年91歲的梅艷芳媽媽覃美金，上周三搭電車返跑馬地寓所，落車時不慎失足跌倒，右腳骨裂入住銅鑼灣聖保祿醫院，目前仍要留醫，翌日幾位阿梅歌迷往醫院探望，他們憐憫梅媽老無所依，梅媽則公開阿梅死前27日（03年12月3日）訂立的遺囑作出大控訴。
甥姪獲教育基金
梅媽在醫院接受本報訪問，她說：「阿梅一直有司機有車畀我用，年幾前架車夠期要續牌，一直冇畀番我，我𠵱家冇車要搭叮叮。遺囑話照顧我有優質生活，每個月有十萬生活費、兩個工人一個司機，但滙豐𠵱家咁折磨我，搞到身體弱晒，行路都冇力。」據遺囑內容顯示，主部份訂明梅媽的優質生活，附件是將兩幢海外物業贈給劉培基（原名劉啟），阿梅的三名甥、姪各獲每年十萬元教育基金。
之前法庭頒令梅媽每月只獲二萬元以下租金津貼，現居跑馬地的寓所今年1月租約期滿，日前執達吏上門收樓，梅媽說：「我啲嘢執唔切，一定要住埋兩個月按金，我一件阿梅遺物都冇，只有佢細個衫褲同初出道少少首飾，我唔會丟，狗佢養開我亦唔會放棄。滙豐揸住我個女億幾身家，當豬肉咁切晒佢，害到我兩年幾冇得食，好在fans接濟我，每人畀三幾千。」
優質生活未兌現
歌迷Eva說：「睇咗阿梅遺囑，最主要受益人係梅媽，滙豐連續7個月冇畀生活費，梅媽先搵律師爭取，有人喺庭上話所有喪禮係佢畀，但我哋睇咗銀行文件，好質疑呢件事，13萬美金喪禮費用係由阿梅遺產攞出嚟。」梅媽聽到老淚縱橫，Eva眼紅紅說：「唔清楚點解法庭判梅媽要住500呎地方，亦唔可以有阿梅遺囑所講嘅優質生活，照顧阿媽百年終老，佢已經91歲，作為母親，發現個女嘅名俾人改咗（阿梅刻在骨灰龕的名字是何冠昌義女何加男），遺物未見過，佢先去法庭諗住有公平判決，阿梅離開十年，佢媽媽𠵱家咁，我哋一啲嘢都做唔到！」
採訪：皓騫
攝影：陳俊強
