國泰有個漫畫女神，就係佢哋嘅靚女空姐黃佩瑤Angela。Angela自細鍾意繪畫，中學時修讀過美術，加入國泰後，工作時間較靈活有彈性，所以有機會利用公餘時間重拾畫筆。佢喺2012年開始創作漫畫，靈感就來自佢平日鍾意上網睇人哋用漫畫表達日常生活趣味，同埋親友對佢工作嘅好奇。有一日佢忽發奇想，點解自己唔用漫畫嚟介紹空姐工作呢？
佢以幽默手法表達，用平板電腦應用程式繪畫，每繪製一幅，就要花幾個鐘，可見幾咁認真。舊年國泰發掘到Angela嘅天份，搵佢同公司員工刊物繪畫「機艙服務員工作小貼士」插圖，譬如溫馨提示艙務員喺起飛前要做足詳細檢查；預備餐飲時記得拉上布簾，唔好影響乘客，佢又畫過一幅描繪艙務員工作嘅畫㖭。
後來，其他部門相繼加入爭奪Angela，請佢幫佢哋創作，例如機艙銷售服務活動，國泰又請佢畫咗兩個機艙服務員漫畫，一男一女，儀態優雅。後來Angela喺艙務員大堂見到掛住自己嘅畫作，先知道公司攞咗去慶祝活動用，覺得好開心呀。