大馬富豪郭令燦嘅國浩（053），旗下國浩資本近排打破專做高端客生意嘅慣例，積極向散戶招手，繼舊年喺荃灣開首間分行後，九龍灣分行今日正式開幕，仲首創24小時開戶服務專區。究竟有幾多人會半夜三更走去開戶，咁心急買股票呢？
國浩揀喺德福開分店，應該係睇中附近銀行客多，又有東九龍市場。至於首創24小時開戶專區，聽聞同財仔自助借錢形式相似，主要係喺分行劃出一個24小時開放嘅角落，散戶透過電腦填妥資料跟手遞交，翌日就會有人處理，有問題仲可以用電話隨時聯絡總部職員。
但根據《證券及期貨條例》，持牌人有責任確保客戶身份，新客開戶必須係與持牌人面對面簽文件，或者要有專業驗證。有華資行負責人質疑國浩呢個專區嘅實際用途，但亦有人話只要客戶提供可兌現嘅銀行支票開戶，應該行得通。