林鄭露底牌：一錘定音，唔使商量！政改既然已經「定音」，等於馬航仍然未找到飛機殘骸，波音公司卻已確認：航班沒遭騎劫、不屬恐襲、跟大馬的民主和新聞自由沒直接關係。（雖然機長曾經穿過一件「民主已死」的tee拍照。）
一錘定音，HK2017，確認被刻意改變航道，這條客機，有冇裝置價值78港元的追蹤系統？有無人持假護照上機？行李艙有冇付運幾噸的山竹？未清楚航機底細前，就叫選民直接登機坐好，你肯制嗎？
「就算飛機餐唔啱胃口，都食住先。」空中少爺勸你。「最緊要坐低慢慢傾。」空中大媽向屈喺經濟艙中間位、腳都伸唔直的你說。「上咗機先，目的地一項留空佢，入境時可以交白表㗎。」你臉露恐懼之色，更多大人物加入游說：「架機一定要飛，唔可以原地踏步。唔飛，代表唔和諧，冇人like。」在你面前冒出了一大片印度洋。「2017唔選，下屆特首冇政治資本再搞，即是，冇油！又關閉晒通訊設備！死得！」你直情聽到馬拉巫師在你頭頂作法，唸唸有辭：愛國愛港，鏡花水月；一人一票，一錘定音（波音）！