有報導話花園街多咗好多吉舖，《蘋果日報》（三月十八日）亦報導「尖沙嘴銅鑼灣吉舖湧現」，銅鑼灣半年出現20吉舖，名店不再瘋狂搶租。呢啲「發現」，不算新奇，左丁山日日路上行，在中環上環一帶，就目睹吉舖街招不斷出現，無人問津。
呢日碰到賓架C，佢係銀行嘅零售及按揭業務主管，對街舖供應、按揭、出售、租賃情況比較熟悉，於是問佢：「市面多咗咁多吉舖，舖租是否受壓下調呢？」賓架C答：「未見到，事實上，我哋銀行在旺區搵地舖開新分行，好難搵到，皆因業主堅決唔肯減租，我哋銀行俾唔起，唔願俾。啲業主情願吉舖丟空，點都唔肯減租！」為何如此？業主唔駛抵押店舖做按揭，要供舖嘅咩？賓架C話：「以我見到嘅情況，如係單一店舖業主，多數係早年買入，早已供完，唔怕銀行逼倉嘅人；如係新業主，多數係炒家財團，實力雄厚，借錢買舖嘅抵押比例偏低，亦唔驚銀行追債。而且利息低成咁，佢哋嘅持有成本，機會成本唔算高昂，咪有資格企硬囉。」
賓架C講得有道理，但以投資成本／市場角度嚟睇，吉舖增加，始終會對舖租有壓力。餐飲M有一個餐廳客戶上月結業（因租金高，生意漸不如前），業主要餐廳租約結束時還原舊貌，清拆現有裝修，餐廳負責人打電話俾相熟判頭，叫佢開工，但判頭話：「對唔住，我正在做緊幾間店舖嘅還原舊貌工作，唔得閒幫你住。」於此可見，吉舖增加趨勢會持續一段時期。店舖業主寧願丟空而唔肯減租吸客，有其風險。聯儲局主席耶倫女士嘅第一次議息會議提到在2015年年底加息到一厘；2016年底加息至二點五厘，加息循環漸已到位，屆時必然增加持有成本，到時業主爭相減租都似。業主實力強，係相對的，不是絕對的，長期嚟講，理性投資者斷無故意放棄穩定現金流收益之理。為香港競爭力着想，政府應該與此同時，撥地興建商廈商場，增加零售店舖供應壓低舖租！有報導話加路連山道嘅機電工程署要搬，騰出龐大地皮作興建商廈商場之用。此事宜早不宜遲，唔好又拖十年呀，好似中環街市咁，既不准拆卸改建，保育又舉步維艱，長期不生不死，真係睇見就眼冤！