李寧（2331）近年大搞改革，希望可以起死回生，仲重金向Nike同Adidas挖角，請咗唔少國際、甚至韓籍設計師返嚟搞新產品，話咁樣會貼近亞洲潮流多啲。噚日業績記者會，公司順便展示一批新產品，服裝設計睇落真係有進步，但某幾對波鞋嘅款式，就唔係人人識得欣賞嘞。
其中一款綠波點設計嘅籃球鞋，驟眼睇係咪有啲似曾相識呢？唔講真係以為靈感來自港人熟識嘅「垃圾蟲」。查實佢係李寧代言人、NBA球星Dwyane Wade系列嘅「聖誕特別版」波鞋，盛惠999元人仔；另外仲有對「馬年特別版」，金色花紋，真係夠晒特別！
聞說Wade系列好誇張，發售幾粒鐘就被內地粉絲掃清光，喺內地微博亦有唔少人討論，甚至有人炒賣。只能夠講，內地消費者嘅口味，跟香港確係有啲出入，起碼佢哋未必識得垃圾蟲。