貪湯事件將廉署嘅形象搞到一鑊泡之際，被視為廉署建立形象重要功臣嘅電視劇《廉政行動》，最新一輯將於下月5日起逢周六晚9點半喺無綫播放。廉署話今輯《廉政行動》最大突破點，就係每集嘅播放時間由以往60分鐘延長至90分鐘，可以將劇情描述得更細緻。
新劇以廉署40年為主題
今輯另一特點係以廉署40年為主題，每集都滲有香港呢40年嘅轉變，包括警廉關係，喺最後一集《戰友》就描述警廉由最初嘅對立關係逐步演變成合作夥伴。其他四集包括以水貨奶粉為主題嘅《明日》，同以打假波為題材嘅《黑球》。
不過，最吸引八方嘅要數以歌星陳奕迅（Eason）老竇、房屋署前總屋宇裝備工程師陳裘大貪污案作藍本嘅《蜘蛛》，劇中由阿旦鄭丹瑞飾演嘅房署總工程師恃住位高權重，向外判商索取利益，劇中更重演陳裘大當年被偷拍到喺辦公室數懷疑贓款嘅經典一幕。
另一集《財迷》就有前「上海首富」周正毅嘅老婆、上海地產前總經理毛玉萍造市及詐騙信用狀案嘅影子。劇中陳煒飾演嘅主角由一個不名一文嘅新來港內地女子拍住上海青梅竹馬嘅情人打天下，憑其八面玲瓏嘅交際手腕，晉身上流社會，但最終因行賄造市而鋃鐺入獄。