台灣警察武力驅散衝擊行政院嘅學生，即刻令人聯想起天安門血腥一幕。中國人屠殺中國人，歷史點會忘記，何況今年係六四事件25周年。身處海外嘅華人已經開始籌備兩個幾月後嘅大型悼念活動，由海外中國維權人士組成嘅「公民力量」舉辦一項六四Google主頁創意塗鴉大賽。
公民力量已經向Google提交咗一幅Google主頁創意塗鴉，希望獲Google選用，於6月4日出現喺Google主頁上，畀全世界人民記住呢個由血同火鑄成嘅日子。
為鼓勵更多人參加，公民力量特設一、二、三等獎，獎金最高有500美元（港幣約3,900元），參賽者可以將作品喺6月4日之前提交Google，郵箱係mailto:[email protected]，作品副本則可以交到公民力量郵箱：mailto:[email protected]。