好多人都知做緊平機會主席嘅周一嶽憑住一曲《忘不了你》技驚政壇，被封「官場技安」，但到底佢係幾時愛上唱歌、點解咁鍾意唱歌？八方噚日就搵到啲端倪。
唱足個半鐘嚇怕師兄
話說主席噚日去咗城大一個名為「書寫紅鞋」嘅反性騷擾論壇，席間有學生講到去O'Camp面對啲限制級嘅遊戲，唔知點say no，York Chow即刻攞咪，講番當年佢做freshman時都試過俾師兄恰，一班行家之後捉住主席逼供，佢大爆原來當年有師兄逼佢當眾唱歌！結果年輕嘅嶽嶽淡淡定，拎住支咪上晒電，無限loop《Where have all the flowers gone?》，嶽嶽足足唱咗個半鐘，loop到阿師兄都頂唔順，仲勁過𠵱家啲歌手開mini concert！
《Where》呢首歌講戰爭殘酷，原唱者西格（Pete Seeger）係美國現代民歌之父，積極投身民權同反越戰運動，York Chow當年揀呢首歌唱，多少反映佢嘅反戰情懷。
講番本業，周一嶽話平機會舊年接到968宗投訴，三分一同性別歧視有關，一成關於性騷擾，喺性別歧視案中，大部份同婦女懷孕被降職有關；講到最近俾人鬧爆、計劃保護自由行免受歧視嘅法例，York就話會檢視種族歧視條例嘅名詞，例如「一個人來源地」、「入境年份」等。
mailto:[email protected]