PEACH JOHN（PJ）呢個牌子，男士就未必識，但女士就一定聽過。呢個Wacoal旗下日系內衣品牌，喺菲菲心目中係極為成功。首先，由舖頭裝修到產品款式，一睇就覺得甜到漏，可愛到就算一個姨姨着上身，都可以令佢重拾少女情懷。質地唔需要上等，但設計靚兼形象鮮明，就已成功吸引一班忠實擁躉。
品牌最勁係識得巧立名目。見到PEACH JOHN近期推出「胸部專用美容膜」，作為女生聽到都嚇一跳，連心口也要敷mask嗎？啲宣傳資料就話防止「胸部鬆弛及向外塌」，更加話大字標題話，「胸部就是女生的第二張臉！不容忽視！」如果係小女生聽到第二塊面會鬆弛，真係好易嚇到佢哋話「巧京京」，仲唔衝去買番幾支！同樣，PEACH JOHN出咗支nipple筆，功能同唇膏一樣。創意度200%，問你死未？你咪以為冇人用，只要成功建立一班長期客仔，你出乜產品佢都會想要。以PEACH JOHN一間咁叻包裝嘅公司，客路？真係唔使替佢擔心。
噚日安莉芳（1388）公佈全年業績，盈利升8%至1.98億元，毛利率微跌。雖然集團網上直銷收益按年增加59.63%，形勢向好，但暫時未對整體盈利帶來太大刺激。睇來公司都要學PEACH JOHN諗計，創造需求去為品牌開源。
Fifi
本欄逢周二、四刊出