要講七人欖球賽，除咗滙豐，國泰航空（293）應該就係呢個比賽嘅鐵腳贊助商，今年係第32年贊助，而且搞新意思，首度舉辦「微笑欖球」義賣活動，扣除成本所得善款將會撥捐「微笑行動中國基金」，幫助患兔唇裂顎嘅小朋友做整形手術。
國泰跟微笑行動合作，製作咗大約3,000個微笑欖球，即日起至本月30日喺銅鑼灣希慎廣場嘅攤位義賣，周五至周日喺欖球村亦有售，每個50元。
聽聞，由於國泰首次將七人欖球賽聯乘慈善活動，所以微笑欖球嘅定價相對保守，擔心定價太高，冇人幫襯，今次主要都係測試市場水溫，全部賣晒都係講緊15萬元左右。其實國泰可以考慮留起十個八個微笑欖球，畀明星球員簽名後進行拍賣，為微笑行動籌更多款項。