要數英超「夜場USB」，相信艾殊利高爾（A高、小圖）一定榜上有名，但係佢嘅最新女友、英國電視台姐仔柏絲歌（圖）就話佢哋拍咗拖3個月，但A高仲好尊重佢，冇硬係要同佢上床，所以，堅信A高已修心養性。
25歲嘅柏絲歌日前接受英國《太陽報》嘅訪問時話，雖然佢同33歲嘅A高已拍拖3個月，但因為要試佢嘅真心，所以冇同佢上床，而A高亦好尊重自己。柏絲高大讚A高如何有風度，所以下個月當柏絲歌生日時，或會有獎勵A高。柏絲歌咁講，令我想起喺十幾年前由型男Josh Hartnett主演嘅電影《美色饑饉40》，戲入面講主角失戀後決定不近女色40日，希望自己最終可成為一個無欲則剛嘅有為青年，但點知喺禁色期間，遇到心中嘅女神。
不過，點睇都唔覺A高咁高尚（因為佢個底實在太花喇），我寧願信佢係仲對歌星前妻雪露未忘情！因為自從喺同雪露離婚後，個個女友都同雪露好似樣。希望唔好畀我講中，柏絲歌只係愛的替身啦。
文：吾中
以女性角度看球星新聞，唔用眉筆用原子筆寫低球壇百態！