NBA球星可能都習慣活在當下，做嘢好少諗後果。早排先有熱火勒邦占士倒「三叔」米，俾網民cap圖瘋傳，最新一位喺呢個「有圖有真相」嘅網上社交世界，大意留低「犯罪」證據嘅球星，就係誤墮色情陷阱嘅溜馬大佬保羅佐治（PG）。
自拍閃卡曝光
23歲嘅PG仲係血氣方剛嘅後生仔，加上球星身份，爛玩唔出奇，不過佢今次俾人玩番轉頭！話說有位自稱保羅嘅男同性戀者，喺網上用張靚女艷照勾搭名人球星，睇吓邊條水魚上釣。都唔知話PG太天真定太儍好，佢毫無戒心咁send咗一系列自拍閃卡畀呢位「靚女」，結果真心換絕情，PG精心做出嘅chok樣加「誘人」甫士，俾人開心share晒出嚟，搞到家陣全世界笑到佢面黃。
其實PG不嬲都有唔少衰嘢，之前試過𡁻完鬆俾人勒索100萬美元「墮胎費」，佢今次被玩完唱，可能就係之前報應。
至於PG嘅溜馬隊友L史堤軒臣都唔好得佢幾多。佢俾傳媒踢爆喺上星期二，老婆幫佢生咗個仔之後，自己夜晚就去咗紐約一間夜總會玩。雖然活動係商業性質，同埋L史堤軒臣玩完都飛返醫院陪老婆，但揼低啱啱生完嘅老婆落club，好似講唔通喎。
溜馬熱火鬥頹
溜馬球員場外負面新聞多，場內表現一樣衰。尤其係明星賽後跌晒watt嘅PG，上星期五對公牛場波拎到三雙，原來只係虛火，第二日作客灰熊入得8分，間接令溜馬輸71:82，球隊仲錄得今季最低分嘅羞家紀錄。睇嚟教練禾高要諗計仔搞掂班兵喇。
東岸1哥溜馬越打越頹，同樣老早攞到季後賽入場券嘅2哥熱火一樣差，喺人哋輸畀灰熊嘅同日，自己作客塘鵝都輸95:105，近11場輸7場。呢場波嘅兩大焦點，分別係塘鵝嘅「一眉狀元」安東尼戴維斯入足30分，連續8場得分都有28+；同埋占士一度拗柴，狀甚痛苦，好彩只係虛驚一場，最後冇事可以繼續比賽。
