過去一個星期，港交所（388）接連失去阿里巴巴同埋屈臣氏兩隻巨無霸新股嘅生意，超人李嘉誠仲要講明屈臣氏今年冇乜機會上市，要等兩、三年先，聽到呢個消息，最難過嘅應該係港交所行政總裁李小加。不過李小加冇咗個橙，執番個桔，最新一期《經濟學人》就讚港交所企硬，冇迎合阿里畀佢以合夥人制度上市係明智之舉。
《經濟學人》認為港交所拒絕阿里嘅特別要求屬於明智，事關香港唔似得美國咁，有機制讓不滿上市公司控股股東嘅投資者透過法庭作出申訴。而且，走咗阿里，仲有好多其他公司等住在港上市嘅。
對於阿里上周日宣佈落實赴美上市，《經濟學人》認為唔少投資者有興趣，不過要留意兩大風險，其一係監管陰霾，好似準備在美上市嘅新浪微博就喺招股書提到，審查制度可能影響生意模式。此外，阿里𠵱家的確係內地電商一哥，但騰訊（700）正急起直追，增加市場競爭。