香港還未發生「佔中」，台北已出現學生佔立法院，抗議兩岸之「海峽兩岸服務貿易協議」（服貿協議）事件，事先民進黨已在立法院大打拉布戰，要協議條文逐項審訂，用意好明顯，就係可拖則拖，希望拖到「服貿協議」胎死腹中，不見天日。執政黨國民黨就要「剪布」，意圖速戰速決，快刀斬亂麻，以佔立法院議席多數嘅優勢，趕快通過了事。純講議會政治，多數黨多數採用如此手段，無可厚非，南韓每次講美韓自由貿易協定，韓農必定舉行大示威，學生支持，執政黨與反對黨互相指罵，司空見慣，但發展到大學生衝入議會議事廳，癱瘓議會工作，搞到行政立法機關手足無措，台灣可算創下亞洲紀錄，泰國即使有癱瘓曼谷之大事，還未見過示威人士佔領泰國國會議事堂噃。台灣執政黨國民黨管治能力之低，令人發笑，馬英九實在不知如何混下去。
睇報紙報導「兩岸服貿協議」要點，似乎台灣佔咗上風，北京旨在經濟統戰，讓步不少。不過對任何左翼嚟講，「自由貿易協定」或類似協定，都係「外人」經濟侵略，文化侵略，打擊本國弱勢社群，故此吃慣政府津貼，競爭力不足嘅既得利益團體必定誓死反對，法國反美，韓國反美，美國工會反任何自由貿易協定，都係出於如此原因。一言而蔽之，就係文化人、農民及內向型（inward looking）經濟團體擁護保護主義，抗拒外來競爭，自甘閂埋門，高舉「維護本土意識」旗幟，但從國家總體利益嚟睇，法國可以閂埋門，拒絕所有美國文化意識及工商貿易咩？韓國可以閂埋門，只顧韓農利益，不理三星現代嘅國際擴充咩？今時今日嘅台灣，就算因為政治理由，唔同大陸搞服貿協議，但面對跨太平洋夥伴協定（TPP）之來勢洶洶，台灣若不參加，將自我孤立，經濟發展會停滯不前，台灣年輕人更難搵工。黃仁龍在港大演講，提及「本土派」年輕人躲在保護主義背後，逃避globalization，轉向tribalization（部落化），實在可圈可點。台北學生佔領立法院，亦作如是觀！