要成為稱職的香港人，就係周一至五生生猛猛，一到放工放假，就喺屋企足不出戶煲中藥，食藥粉。Samantha經過多年捱夜，食無定時的洗禮，最近也加入藥煲行列，都市人身體出現結構性問題，西藥搞唔掂，個個投誠於中醫，而中醫藥費都翻幾番，索價由500蚊至幾千蚊不等，唔怪之得啲中成藥股去年升得咁誇張。
正當向執藥阿姐抱怨：又加價？「小姐，全中國都搶緊藥材，你知唔知啲靚藥幾難買？前排醫師行咗好多個地方先搵到啲靚麻黃，見到淨返個十斤八斤都同佢掃清板。」翻查資料，原來藥材價格早出現強勁升浪，人民網早前報道，受天氣等因素影響產量減少，供應緊張，部份藥材價格漲幅逾50%。
究竟藥材價格升，對中成藥股來說好事定壞事？可從生產及銷售中成藥的同仁堂科技（1666）略知一二，該集團上周公佈2013年業績，銷售收入29.1億元（人民幣．下同），增長19%，淨利潤為3.9億元，上升18%，增長較2012年慢，毛利率亦下調1.2個百分點至49.5%。
公司解釋，在藥品生產質量及經營質量管理規範嚴厲實施下，醫藥業再有洗牌，加上中藥材價格一直高企，人工成本、運輸成本上漲。多隻中成藥股即將公佈業績，若炒業績恐怕隨時大熱倒灶。
Samantha
本欄逢周一、三、五刊出