台灣學生佔領立法院，公民黨陳淑莊Tanya亦喺上周五急急飛到台北聲援。Tanya話搭的士去立法院期間，司機一知道佢係香港人、專誠去立法院支持學生，即時豎起手指公，大聲疾呼話要義載唔收錢，Tanya連忙耍手擰頭，堅持畀錢，佢話事件反映小市民上下一心支援學生。
Tanya話台灣人上街集會嘅紀律，同香港人一樣相當有秩序同和平，亦聽命於活動嘅指揮者，令想搞事嘅人無從入手：「因為現場太逼，上面指揮話每人要退後五步，佢哋就跟住數一、二、三、四、五退五步。」由於要返港主持噚日嘅佔中義工隊揭幕，所以佢留咗兩日就速速告退。