好多人話女人貪慕虛榮愛名牌，其實男人咪一樣！滙豐報告發現，女人買名牌雖然仍然比較多，但男人嘅比例已經由1995年嘅35%，增加至舊年嘅40%，而且估計未來年輕都會男性將會成為奢侈品牌增長動力。
報告將呢種年輕都會男性（Young Urban Male）稱之為「YUMMY」，由日韓開始興起，並逐漸成為全球現象。以前男人只係鍾意買車、電子產品等玩具，𠵱家開始注重外表，多咗買戶外活動用品、時裝、飾物，甚至化妝品。
呢班YUMMY年輕又有錢，多數已經有車，所以開始追求其他物質享受。佢哋普遍比較遲婚，冇家庭負擔又可以使多啲，加上𠵱家男性打扮都好講究，因此好多奢侈品牌都積極拓展呢個新市場。但由於男人對經濟情況嘅敏感度較高，所以如果依賴YUMMY作為品牌增長動力，經濟衰退時就面對較大風險。