仲有唔夠一個月就到復活節。今年打工仔有成四日假，可以去個短Trip，以往亦有唔少香港人怕頻撲，鍾意近近地過大海去澳門輕鬆吓。不過，如果你仲未訂房，就可能無呢支歌仔唱啦。事關大部份澳門三星至五星級嘅酒店喺復活節期間已經訂爆晒，七成客係強國人。
旅行社職員話，較受香港人歡迎嘅銀河旗下四間酒店已經full晒，其中銀河酒店加價七成到3600蚊晚，都照full。有得睇水舞間嘅新濠天地又full！ 賭后何超瓊嘅美高梅一間普通房要4025蚊，貴絕行家，都full！一向房唔多嘅永利唔使講，full！五星級酒店，得番威尼斯人同金沙，仲有少量房間。 但有你都未必肯住，因為貴得離譜。威尼斯人一間大床房一晚要成3600蚊！雙人房要3750蚊！金沙住一晚亦都要3300蚊，比平時足足貴咗兩成加埋船飛，隨時去到個東南亞短trip。
唔單止五星級酒店，賭仔至愛嘅財神酒店，一晚都要成1800蚊，而且復活節一樣爆滿。旅行社職員話，最平嘅兩星級酒店「假期酒店」，一晚都要700蚊！其他兩星酒店，分別要800至1200蚊！睇來復活節想過大海，又貴又逼，都係拿拿臨重新計劃啦。
iPhone版下載：
http://goo.gl/NOVDXJ
Android版下載：
http://goo.gl/tgTyGg