三大中資電訊股都已經公佈業績，其中一哥中移動（941）雖然大賺逾1,200億人仔，但屬於公司上市以來第一次全年倒退，加上預告未來兩年都要做大花筒，投資巨額搞4G，可以預見公司喺未來兩年都要慳住使，唔知係咪呢個原因，公司今年業績會派發畀傳媒嘅presentation（推介資料）都唔同咗，由往年用開釘有透明膠面嘅版本，變為最普通嘅釘裝版，亦由過往嘅單面印刷變成雙面印刷。
據專業嘅公關老友講，釘有透明膠面嘅推介資料，一般每本貴十蚊左右，視乎頁數而定，採用雙面印刷，既環保又慳錢，何樂而不為。至於今年業績較過去幾年靚仔嘅聯通（762）就剛剛相反，今年採用釘有透明膠面嘅presentation。聯通過去兩年都用最普通嗰款釘裝版，業績靚仔咗，喺呢啲細位都睇得出分別。