拜仁慕尼黑本來大想頭，諗住上周六德甲作客2:0贏緬恩斯後就封王，但第2位嘅多蒙特就一於拖一拖佢先，同日亦作客大勝漢諾威3:0，繼續維持住落後23分嘅差距；話就話稱霸hold住先，但其實拜仁都係等多3日啫，只要周二開快車時，作客再贏哈化柏林，到時話知多蒙特另一邊廂奇蹟大炒史浩克100:0，再加之後餘下7輪聯賽贏晒都好，都一樣夠分提早封王！
講番上周六場波，其實拜仁都唔係贏得輕鬆㗎，攻來攻去都攻唔入緬恩斯嘅銅牆鐵壁，仲爭啲喺下半場早段失波先，好彩對方前鋒祖普莫亭黑仔射中楣；結果要打到82分鐘，先由「小豬」舒韋恩史迪加（圖）頭槌頂入，打破僵局，然後4分鐘後，列貝利就把握敵軍守衞出錯，引埋對方門將卡利奧斯出小禁區後，左路橫傳入中間嘅馬里奧葛斯射空門建功，奠定2:0勝局。
周二贏波即搞掂
雖然未捧得盃住，但拜仁贏埋呢場後，一樣夠晒威，所創啲紀錄，我求大俠睇到眼到凸埋。首先，呢場勝仗係佢哋聯賽嘅18連勝，打破咗國際米蘭喺意甲06/07球季，創造嘅5大聯賽連勝紀錄；另外，佢哋亦追平咗自己上季創下嘅德甲客場9連勝紀錄，同埋已經連續51輪聯賽不敗，所以下輪作客贏到哈化，佢哋就又可以刷新自己嘅紀錄。
哥帥望除後顧衝歐聯
賽後，入波功臣小豬就話唔介意幾時可以拎到冠軍，最緊要係球隊可以保持呢種長勝嘅走勢，尤其佢覺得緬恩斯一向好難應付，咁都過到關，證明佢哋真係好好狀態。教練哥迪奧拿就似乎比啲球員仲心急，好期待禮拜二就可以奠定呢個王座，唔好以為佢人生準備第一次拎德甲先咁緊張，其實4月頭就要喺歐聯8強同曼聯碰頭，雖然對方今季冇料到，但哥帥都想快啲冇後顧，將精力完全放喺歐聯衞冕之路上囉！
