食神肥滔曾說：「打邊爐，最緊要梗係個爐！」咁睇波，最緊要梗係場波！若希望以其他「配料」喧賓奪主，搶贏場波做主角，幾乎是不可能。近日有傳意甲為挽回人氣，打算培訓靚女球證伊蓮娜譚比妮上意甲執法。美人計當然是於球場一堆男人中突圍而出的妙計，好似車路士靚女軍醫伊華，睇車仔比賽時，不期然會「期待」有車仔球員受傷，以一睹伊華風姿！
當然，伊華只是球場很小部份；要看譚比妮亦可能要等幾年。在我心中，曾經可搶過球賽風頭的，只有二人。第一位是意大利傳奇球證哥連拿。其執法水平之高不用多說，最重要是「光頭神探」造型、烱烱有神目光，執法時果斷氣勢，令人印象難忘。
當年評述意甲，遇着深夜直播悶戰，咁啱係光頭神探執法，便暗自慶幸，睇吓哥連拿都係娛樂！一次親訪意大利，入場睇羅馬對費倫天拿，甫踏入看台便感受到身後一股氣，回身抬頭一望，竟就在座無虛席的看台中，一眼便看到哥連拿那銳利眼神，在高處看台睇波！其氣場之強勁，可想而知！
第二位，是人稱「桂神」的黃興桂。入行時電視台高層向小弟說：「講波佬，係配角嚟咋！切勿喧賓奪主。」但Peter的鏗鏘聲線、連環金句、笑料中蘊含專業分析和視野，確係本港評述員中獨一無二，足以令人不論戲碼，均有興趣期待他的評述。今年世界盃，唔知桂神有無新金句出爐？
方柏翹
now足球評述員