【又一城】香港電視網絡（HKTV）開台無期，身為港視藝人嘅姜文杰因為擔心前途，日前自爆要借酒澆愁。不過，原來佢事業失意但愛情得意，曾經同石詠莉傳緋聞嘅姜文杰，身邊已經有個靚女女友。
日前傍晚6點左右，記者撞見姜文杰同新女友去又一城間Franc Franc睇家品，試梳化時有講有笑，跟住姜文杰拖女友去另一間家品店睇床上用品，睇完之後再去飲咖啡，其間姜文杰見女友嘴角有啲咖啡泡沫，仲好體貼咁用手抹走啲泡㖭，真係sweet到爆！
女友選美奪冠
原來姜文杰新女友叫李泳淇（Rain），舊年參加過香港珠寶小姐，仲攞到冠軍同最上鏡小姐，而之前姜文杰去韓國時撞見胡杏兒、李思捷時一齊大合照，Rain都喺相中出現過，睇嚟佢哋戀情都好穩定。對於同Rain拍拖，姜文杰前日喺電話度話：「嗰個係我嘅新朋友，佢同我性格都好夾，大家了解中囉。」
問到點認識，姜文杰話：「之前同佢拍YouTube 一條短片（《在酒吧遇見的十五種人》），見咗面幾次，識咗三個幾四個月。」睇床上用品同家品，唔通好事近？姜文杰就話睇床上用品只係純粹睇睇，睇梳化就係幫個妹姜麗文睇吓MV道具喎。
採訪、攝影：陳辰、李志明
