如果八方預告，唐唐最新結晶品會喺下個月出爐，大家係咪好有遐想呢？但查實唐唐呢個結晶品，只係佢專心鑽研出嚟嘅政改方案咋，大家咪諗錯隔籬喎！話晒都係全國政協常委，唐唐梗係要為政改出謀獻策，據知佢連月已經搵咗各方人士聽意見，精心炮製一個政改方案，佢喺微博預告，4月會正式提意見，肯定可以趕及5月初結束嘅政改諮詢死線啦。除咗會整個斷估唔會繼續「用選梁振英嘅方法」選特首嘅方案，唐唐仲殺入學校講政改，上周六去到元朗公立中學向在場逾300學生講解政改五部曲，據聞席間大家好踴躍提問，唐唐鼓舞之餘，都鼓勵學生多啲就政改發聲。