英超「紅魔鬼」曼聯戰績浮沉，有「藍魔鬼」之稱嘅美國大學界男籃勁旅杜克，竟然仲衰；上周五NCAA嘅64強首圈，由名帥科錫維斯基（K教練）領軍嘅杜克，竟然遇上滑鐵盧，爆冷以7分不敵摩瑟，怪只怪美國AV女星Belle Knox發功過度，搞死班杜克仔。
NCAA踏入瘋狂3月（March Madness），由64強打到上總決賽都係一場過分勝負。呢個月，NCAA喺全美受歡迎嘅程度仲勁過NBA㖭。身為杜克學生，成人影片女星Belle諗住支持吓班男同學仔，賽前就話如果3號種籽嘅杜克順利獲得冠軍，就會送每位球員一款佢旗下嘅情趣玩具，等球員有同佢床上溫馨嘅感覺云云。
拍鹹片為籌學費
可能係杜克男籃定力唔夠，上周五首戰面對實力平平嘅14號種籽摩瑟，竟然以71:78落敗，盛傳今年NBA選秀狀元熱門之一嘅杜克前鋒J柏加，雖然都有14分進賬，但命中率只得28.5%，3分球仲3射全炒㖭。呢位19歲前鋒或者因為首圈出局咁瘀皮，所以賽後講自己大學生涯未必完結，希望幫杜克再打多一年。K教練賽後亦好有風度咁去摩瑟更衣室祝賀。
Belle雖然發功失敗，不過佢賽後仍然話：「佢哋力戰而敗，我仍然深愛佢哋，所以我照舊會送玩具畀佢哋。」杜克貴為美國高級學府，竟然有位AV女星學生就讀法律系一年級咁奇情？原來Belle背後有段可歌可泣嘅故事，Belle嘅爸爸去咗阿富汗做軍醫，負擔唔起Belle嘅學費，搞到佢要半工讀拍鹹片，籌旗支付杜克高達6萬美金一年嘅學費，以AV女星嚟講，佢都算知書識禮嘞，但Belle咁熱心，竟然收到死亡恐嚇！
股神10億巨獎冇人中
同日其他NCAA戰果都算正路，同J柏加爭緊狀元嘅堪薩斯後衞A域堅斯，就獨取19分，助球隊以80:69淘汰東肯塔基；亞利桑那亦順利淘汰韋伯州立。但隨住杜克出局，加上新墨西哥等前列種籽下馬，股神畢菲特懸賞10億美元（約77.6億港元）嘅NCAA巨大彩池，1,100萬參加者全軍覆沒，只有20名成績最佳參賽者可獲10萬美元安慰獎，要一個月之間成為億萬富豪，就要等下年。
