馬航MH370失蹤事件，神秘莫測，至今疑團未解，引起全世界人士討論，各式各類嘅陰謀論、假設理論紛紛出籠，穿鑿附會到冇得頂，但一日未搵到飛機、找到飛行黑盒之前，邊個敢話人地係錯嘅？最令人惦掛嘅機上乘客，在整個過程中有甚麼行為，例如是否奮起反抗，或者係當飛機衝上四萬幾呎高空，再下降到二萬三千呎時，是否已經全部昏迷不醒，任由機艙內控制人員為所欲為？想一想，已經打冷震。
適逢有一套電影「直航殺機」上演，不少人入戲院睇戲，據now電視影評人林娉婷大姐所講，呢套戲嘅劇情十分犯駁，只係賣弄公式化緊張，並非一套好電影，但做生意最緊要撞啱時辰，呢個時候上演，賣座當然會好過預期啦。小YY睇過套戲，睇過CNN新聞，若有所思，特登走返老竇屋企，在書架上搜索佢中學時代睇過嘅一百餘本衞斯理科幻小說，佢老竇中學時代將佢睇完嘅瓊瑤全集，衞斯理全集，加上幾十本日本推理小說如「三色貓」等放在一角，小YY搵咗一輪，卒之抽出一本叫做「第二種人」嘅科幻小說第十一版，係1987年一月版本，內容係衞斯理調查飛機失事，第九頁有：「馬基機長是生還者之一，又看失事的經過情形，飛機是在飛越馬來半島之後，突然發出緊急降落的要求，當時，接獲要求的是沙巴的科塔基那波羅機場……」之後，衞斯理與白素去調查失事原因，發現了地球上有第二種人的存在（第二種人係動物和植物的結合，地球上最早出現的高級生物）。作者倪匡為小說寫咗一個小序，講「第二種人」出版後，一架日航客機在日本失事，由於機長動作失常，導致整架飛機衝了入海，後來搵到黑盒，發現出事前一剎那，聽到機長與副機長嘅對話，與小說竟然完全一樣。MH370機長係馬來人，據各方面報導，如果失蹤飛機係由佢一路操控嘅，佢嘅專業技術高超到無倫，非一般有經驗嘅民航機師可比，馬來機師竟有如此高人？個個都估唔到。小YY話：「嘩，佢係第二種人，衞斯理吖嗎！」